तराईको आन्दोलनबारे भारतका सांसदलाई चासो

गोपाल भण्डारी/कपिलवस्तु,

कपिलवस्तु, भदाै ९ - 

 दुई हप्तादेखि तराईमा चलिरहेको आन्दोलनलाई भारतीय क्षेत्रका सांसदले पनि चासो राखेपछि कपिलवस्तुका ३ सभासदले भारतीय सांसदसँग भारतको सिद्धार्थनगर जिल्लाको नौगढमा भेटघाट गरेका छन् ।

तराई मधेश लोकतान्त्रिक पार्टीका सभासद् बृजेश कुमार गुप्ता, संघीय समाजवादी फोरम नेपालका सभासद् अभिषेक प्रताप साह, सद्भावना पार्टीका सभासद् नरसिंह चौधरी र फोरम नेपालका केन्द्रिय सदस्य सहसराम यादवले भारत सिद्धार्थनगर जिल्लाका भारतीय जनता पार्टीका लोकसभाका सांसद जगदम्विका पालसंग भेटघाट गरेका हुन् । 

भेटघाटका क्रममा भारतीय सांसद् पालले तराईमा २ हप्ता बढी आन्दोलन भैरहँदा आन्दोलनका एजेण्डाहरुलाई सरकारले सम्वोधन गर्न नसक्नु दुखद कुरा भएको भन्दै वार्ताको माध्ययमबाट नेपाल सरकारले तराईको मुद्दालाई समाधान गर्नुपर्नेमा जोड दिएको सभासद् गुप्ताले जानकारी दिनुभयो । मधेश आन्दोलनका क्रममा विगतका सरकारसँग गरिएको सम्झौता अनुसार अन्तरिम संविधानको धारा १३८ को १ मा लेखिए अनुसारको स्वायत्त मधेश प्रदेशको निर्माणका लागि आफुहरु आन्दोलित हुनु परेको सभासद् गुप्ताले भारतीय सांसदलाई जानकारी गराएको बताउनुभयो ।

भारतीय सांसद पालले आफुहरुको आन्दोलनलाई शुभकामना दिएको र दिल्ली सरकारसँग पनि यो आन्दोलनका एजेण्डाहरुलाई वार्ताबाट टुंगो लगाउनका लागि आवाज उठाउने प्रतिवद्धता जनाएका छन् ।